ਅੰਮ੍ਰਿਤਸਰ - ਗੁਰਦਵਾਰਾ ਚੋਣ ਨੂੰ ਲੈ ਕੇ ਵੋਟਰਾਂ ਵਿਚ ਦਿਲਚਸਪੀ ਨਾਹ ਦੇ ਬਰਾਬਰ ਦੇਖਦੇ ਹੋਏ ਗੁਰਦਵਾਰਾ ਚੋਣ ਕਮਿਸ਼ਨ ਨੇ ਵੋਟਰ ਬਣਨ ਲਈ ਸਮੇਂ ਵਿਚ 31 ਅਕਤੂਬਰ ਤਕ ਆਖਰੀ ਵਾਧਾ ਕਰਨ ਦਾ ਐਲਾਨ ਕੀਤਾ ਹੈ। ਜਾਰੀ ਪੱਤਰ ਵਿਚ ਗੁਰਦਵਾਰਾ ਚੋਣ ਕਮਿਸ਼ਨ ਰੀਟਾਇਰਡ ਜਸਟਿਸ ਐਸ ਐਸ ਸਾਰੋਂ ਨੇ ਗੁਰਦਵਾਰਾ ਚੋਣਾਂ ਲਈ ਪੁਰਾ ਪ੍ਰੋਗਰਾਮ ਜਾਰੀ ਕੀਤਾ ਹੈ। ਪੱਤਰ ਮੁਤਾਬਿਕ ਗੁਰਦਵਾਰਾ ਚੋਣਾਂ ਲਈ ਵੋਟਰ ਬਣਨ ਲਈ ਆਖਰੀ ਤਰੀਕ 31 ਅਕਤੂਬਰ 2024 ਤਹਿ ਕੀਤੀ ਗਈ ਹੈ। ਵੋਟਰ ਸੂਚੀਆਂ ਦੀ ਪਹਿਲੀ ਛਪਾਈ 4 ਨਵੰਬਰ ਤੋਂ 13 ਨਵੰਬਰ ਤਕ ਕੀਤੀ ਜਾਵੇਗੀ। 14 ਨਵੰਬਰ ਨੂੰ ਵੋਟਰ ਸੂਚੀਆਂ ਡਿਪਟੀ ਕਮਿਸ਼ਨਰ ਦਫਤਰ ਵਿਚ ਰੱਖੀਆਂ ਜਾਣਗੀਆਂ। ਇਹਨਾ ਸੂਚੀਆਂ ਤੇ 4 ਦਿਸੰਬਰ ਤਕ ਇਤਰਾਜ਼ ਦਰਜ ਕਰਵਾਏ ਜਾ ਸਕਦੇ ਹਨ। ਵੋਟਰ ਸੂਚੀਆਂ ਦੀ ਆਖਰੀ ਸੁਧਾਈ 16 ਦਿਸੰਬਰ ਨੂੰ ਹੋਵੇਗੀ। 3 ਜਨਵਰੀ 2025 ਨੂੰ ਵੋਟਰ ਸੂਚੀਆਂ ਦੀ ਫਾਈਨਲ ਛਪਾਈ ਕੀਤੀ ਜਾਵੇਗੀ। ਸਾਰਾ ਪ੍ਰੋਗਰਾਮ ਡਿਪਟੀ ਕਮਿਸ਼ਨਰ ਦਫਤਰਾਂ ਨੂੰ ਜਾਰੀ ਕਰ ਦਿੱਤਾ ਗਿਆ ਹੈ। ਜਾਣਕਾਰੀ ਮੁਤਾਬਿਕ ਗੁਰਦਵਾਰਾ ਚੋਣ ਕਮਿਸ਼ਨ ਹੁਣ ਤਕ ਵੋਟਰ ਬਣਨ ਲਈ 4 ਵਾਰ 29 ਫਰਵਰੀ 2024, 30 ਅਪ੍ਰੈਲ 2024, 31 ਜੁਲਾਈ 2024 ਅਤੇ 16 ਸਤੰਬਰ 2024 ਤਕ ਮੌਕਾ ਦੇ ਚੁੱਕਾ ਹੈ ਪਰ ਸਿੱਖ ਵੋਟਰ ਇਹਨਾਂ ਚੋਣਾਂ ਵਿਚ ਦਿਲਚਸਪੀ ਨਹੀਂ ਦਿਖਾ ਰਹੇ।