ਡੋਨਾਲਡ ਟਰੰਪ ਅਮਰੀਕਾ ਦੇ ਮੁੜ ਰਾਸ਼ਟਰਪਤੀ ਚੁਣੇ ਗਏ

ਡੋਨਾਲਡ ਟਰੰਪ ਅਮਰੀਕਾ ਦੇ ਮੁੜ ਰਾਸ਼ਟਰਪਤੀ ਚੁਣੇ ਗਏ ਹਨ। ਉਸ ਨੂੰ 50 ਰਾਜਾਂ ਦੀਆਂ 538 ਵਿੱਚੋਂ 277 ਸੀਟਾਂ ਮਿਲੀਆਂ ਹਨ, ਬਹੁਮਤ ਲਈ 270 ਸੀਟਾਂ ਦੀ ਲੋੜ ਹੈ। ਡੈਮੋਕ੍ਰੇਟਿਕ ਪਾਰਟੀ ਦੀ ਉਮੀਦਵਾਰ ਕਮਲਾ ਹੈਰਿਸ ਸਖ਼ਤ ਟੱਕਰ ਦੇਣ ਦੇ ਬਾਵਜੂਦ ਸਿਰਫ਼ 224 ਸੀਟਾਂ ਹੀ ਜਿੱਤ ਸਕੀ। ਟਰੰਪ 2016 ਵਿੱਚ ਪਹਿਲੀ ਵਾਰ ਰਾਸ਼ਟਰਪਤੀ ਬਣੇ ਸਨ ਅਤੇ 2020 ਵਿੱਚ ਜੋ ਬਿਡੇਨ ਤੋਂ ਹਾਰ ਗਏ ਸਨ। 

ਇਸ ਦੇ ਨਾਲ ਹੀ ਟਰੰਪ ਅਮਰੀਕੀ ਇਤਿਹਾਸ ਵਿਚ ਪਹਿਲੇ ਅਜਿਹੇ ਨੇਤਾ ਹਨ ਜਿਨ੍ਹਾਂ ਨੇ ਰਾਸ਼ਟਰਪਤੀ ਚੋਣਾਂ ਵਿਚ ਮਹਿਲਾ ਉਮੀਦਵਾਰਾਂ ਨੂੰ ਦੋ ਵਾਰ ਹਰਾਇਆ ਹੈ। ਅਮਰੀਕਾ 'ਚ ਅਜਿਹਾ ਸਿਰਫ ਦੋ ਵਾਰ 2016 ਅਤੇ 2024 'ਚ ਹੋਇਆ ਹੈ ਜਦੋਂ ਉੱਥੇ ਕੋਈ ਔਰਤ ਰਾਸ਼ਟਰਪਤੀ ਅਹੁਦੇ ਦੀ ਉਮੀਦਵਾਰ ਬਣੀ ਸੀ।

ਟਰੰਪ ਦੀ ਪਾਰਟੀ ਨੂੰ ਉਪਰਲੇ ਅਤੇ ਸ਼ਕਤੀਸ਼ਾਲੀ ਸਦਨ ਸੈਨੇਟ ਵਿਚ ਬਹੁਮਤ ਹਾਸਲ ਹੈ।
ਅਮਰੀਕਾ ਵਿਚ ਰਾਸ਼ਟਰਪਤੀ ਅਹੁਦੇ ਦੇ ਨਾਲ-ਨਾਲ ਸੰਸਦ ਦੇ ਦੋਵਾਂ ਸਦਨਾਂ, ਸੈਨੇਟ ਅਤੇ ਪ੍ਰਤੀਨਿਧੀ ਸਭਾ ਲਈ ਵੀ ਚੋਣਾਂ ਹੋਈਆਂ ਹਨ। ਸੈਨੇਟ ਸੰਸਦ ਦਾ ਉਪਰਲਾ ਸਦਨ ਹੈ। ਇਸ ਦੀਆਂ 100 ਸੀਟਾਂ ਵਿੱਚੋਂ, ਹਰੇਕ ਰਾਜ ਕੋਲ 2 ਸੀਟਾਂ ਹਨ। ਇਸ ਦੀਆਂ ਇੱਕ ਤਿਹਾਈ ਸੀਟਾਂ ਲਈ ਹਰ ਦੋ ਸਾਲ ਬਾਅਦ ਚੋਣਾਂ ਕਰਵਾਈਆਂ ਜਾਂਦੀਆਂ ਹਨ।

ਇਸ ਵਾਰ ਸੈਨੇਟ ਦੀਆਂ 34 ਸੀਟਾਂ ਲਈ ਚੋਣਾਂ ਹੋਈਆਂ ਸਨ। ਤਾਜ਼ਾ ਨਤੀਜਿਆਂ ਨਾਲ ਰਿਪਬਲਿਕਨ ਪਾਰਟੀ ਨੇ 52 ਸੀਟਾਂ ਹਾਸਲ ਕੀਤੀਆਂ ਹਨ, ਜੋ ਬਹੁਮਤ ਦੇ ਬਰਾਬਰ ਹੈ। ਪਹਿਲਾਂ ਇਸ ਦੀਆਂ 49 ਸੀਟਾਂ ਸਨ।

ਅਮਰੀਕਾ ਵਿੱਚ, ਉਪਰਲਾ ਸਦਨ ਭਾਵ ਸੈਨੇਟ ਵਧੇਰੇ ਸ਼ਕਤੀਸ਼ਾਲੀ ਹੈ, ਕਿਉਂਕਿ ਇਸਨੂੰ ਮਹਾਂਦੋਸ਼ ਅਤੇ ਵਿਦੇਸ਼ੀ ਸਮਝੌਤਿਆਂ ਵਰਗੇ ਮਹੱਤਵਪੂਰਨ ਮੁੱਦਿਆਂ ਨੂੰ ਮਨਜ਼ੂਰੀ ਜਾਂ ਨਾਮਨਜ਼ੂਰ ਕਰਨ ਦਾ ਅਧਿਕਾਰ ਹੈ। ਇਸ ਦੇ ਮੈਂਬਰਾਂ ਨੂੰ ਸੈਨੇਟਰ ਕਿਹਾ ਜਾਂਦਾ ਹੈ, ਜੋ 6 ਸਾਲਾਂ ਲਈ ਚੁਣੇ ਜਾਂਦੇ ਹਨ, ਜਦੋਂ ਕਿ ਪ੍ਰਤੀਨਿਧੀ ਸਭਾ ਦੇ ਮੈਂਬਰ ਸਿਰਫ਼ ਦੋ ਸਾਲਾਂ ਲਈ ਚੁਣੇ ਜਾਂਦੇ ਹਨ।

ਰਿਪਬਲਿਕਨ ਪਾਰਟੀ ਪ੍ਰਤੀਨਿਧੀ ਸਭਾ ਵਿੱਚ ਬਹੁਮਤ ਦੇ ਨੇੜੇ ਹੈ। ਇਸ ਦੀਆਂ 435 ਸੀਟਾਂ ਲਈ ਹਰ 2 ਸਾਲ ਬਾਅਦ ਚੋਣਾਂ ਕਰਵਾਈਆਂ ਜਾਂਦੀਆਂ ਹਨ। ਬਹੁਮਤ ਲਈ 218 ਸੀਟਾਂ ਦੀ ਲੋੜ ਹੈ। ਰਿਪਬਲਿਕਨ ਪਾਰਟੀ ਨੇ 197 ਅਤੇ ਡੈਮੋਕ੍ਰੇਟਿਕ ਪਾਰਟੀ ਨੇ 177 ਸੀਟਾਂ ਹਾਸਲ ਕੀਤੀਆਂ ਹਨ।

ਭਾਵੇਂ ਉਪਰਲਾ ਸਦਨ ਭਾਵ ਸੈਨੇਟ ਸ਼ਕਤੀਸ਼ਾਲੀ ਹੈ, ਪਰ ਸਰਕਾਰ ਚਲਾਉਣ ਵਿਚ ਦੋਵਾਂ ਸਦਨਾਂ ਦੀ ਬਰਾਬਰ ਭੂਮਿਕਾ ਹੈ। ਸੰਸਦ ਦੇ ਦੋਵਾਂ ਸਦਨਾਂ ਵਿੱਚੋਂ ਕਿਸੇ ਇੱਕ ਵਿੱਚ ਬਹੁਮਤ ਨਾਲ ਬਿੱਲ ਪਾਸ ਕੀਤਾ ਜਾ ਸਕਦਾ ਹੈ।